ថៃ៖ រដ្ឋលេខាធិការក្រសួងទេសចរណ៍ និងជាបេសកជនពិសេស CAMSOC លោក ហោ សារុន និងប្រធានប្រតិបត្តិសហព័ន្ធកីឡាអាស៊ីអាគ្នេយ៍ និងជាអនុប្រធានគណៈកម្មាធិការជាតិអូឡាពិកថៃ លោក Dato Seri Chaiyapak siriwat ចុះពិនិត្យទីតាំងនៃពហុកីឡដ្ឋាន RAJAMANGALA នៃទីក្រុងបាងកក ដើម្បីត្រៀមរៀបចំពិធីដង្ហែព្រះអគ្គិជ័យកីឡា និងភ្លើងគប់ នាល្ងាចថ្ងៃទី១៧ ខែមេសាស្អែកនេះ។

ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានទៅដល់ទីក្រុងបាងកក ប្រទេសថៃ នៅល្ងាចថ្ងៃទី១៥ ខែមេសា ឆ្នាំ២០២៣។

ពិធីដង្ហែ អគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេមជុំវិញបណ្តាប្រទេសអាស៊ាន គឺដឹកនាំដោយរដ្ឋលេខាធិការក្រសួងទេសចរណ៍ លោក ហោ សារុន។

ភ្លើងគប់កីឡា បានដង្ហែដល់ប្រទេសថៃ ដែលជាប្រទេសទី៧ បន្ទាប់ពីប្រទេសសិង្ហបុរី ម៉ាឡេស៊ី ទីម័រខាងកើត ឥណ្ឌូណេស៊ី ហ្វីលីពីន វៀតណាម។ ភ្លើងគប់កីឡា នឹងបន្តឆ្ពោះទៅប្រទេស មីយ៉ាន់ម៉ា និងឡាវ រួចហើយនឹងបន្តមកកម្ពុជាវិញនៅថ្ងៃទី២៧ ខែមេសា ឆ្នាំ២០២៣ ដោយដង្ហែជុំវិញបឹងទន្លេសាបមុនឡើងមកដល់ពហុកីឡដ្ឋានជាតិមរតកតេជោ នៅថ្ងៃទី៥ ខែឧសភា ឆ្នាំ២០២៣ ដែលជាថ្ងៃបើកការប្រកួតកីឡាស៊ីហ្គេម-ប៉ារ៉ាហ្គេម។

នៅសល់តែ ១៩ថ្ងៃទៀតប៉ុណ្ណោះ គិតត្រឹមថ្ងៃទី១៦ ខែមេសា ឆ្នាំ២០២៣ ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣ នឹងឈានមកដល់ហើយ៕